【Viu】仲有9日「4.30」就係「姜濤誕」啦！是咪好興奮呢！一班姜糖為咗同至愛姜濤慶祝，策劃咗一系列嘅生日應援活動，包括喺尖沙咀The ONE、銅鑼灣皇室堡兩大商場set up慈善期間限定店，開放日期由聽日（22日）至5月22日，分別以生日、籃球做主題，全部都好「打卡able」！而兩個地方各有唔同精品發售，所得收入扣除成本後會全數捐畀多間同兒童、毛孩、弱勢社群嘅相關慈善機構，真係好有愛心呀！而其中喺尖沙嘴嘅限定店仲有DIY手提電腦袋、tote bag同攬攬Cushion添！
呢次fans club同商場邀請咗幾對親子「姜糖」做model，享受追星親子樂！先有Africa同7歲囝囝Hayden，Africa話由2018年、播《全民造星》嗰陣就愛上姜濤，覺得偶像寧舍有感染力同魅力，仲話當湊小朋友好大壓力時，姜濤係起到抒壓作用，嚟緊偶像生日都盡量抽時間同小朋友去打卡；之後有Wendy同6歲囡囡Ginny，媽媽笑話自己仲係姓姜添！然後話喺上年5月睇完MIRROR演唱會先「入坑」，平時就鍾意睇考古片，再感染埋囡囡鍾意姜濤，至於老公，Wendy笑話唔算「前夫」：「佢好支持，今日仲幫我哋揀衫，好開心、好正面！」
仲有6歲Sienna做小model，同埋媽媽Pandora一齊受訪，Pandora大讚姜濤為人夠真又謙卑：「23歲就咁叻，一個值得鍾意嘅偶像！」除咗去勻生日應援打卡點之外，仲諗住喺「4.30」姜濤正日生日去搭叮叮；「姜糖」DaDa專登請假，帶埋「小濤濤」率先嚟潮聖：「我鍾意咗姜濤年半，鍾意佢用作品說話、人品、唱歌、跳舞，咩都鍾意！」
另外，fans club仲喺銅鑼灣地帶設有大型廣告版賀「姜誕」，各位「姜糖」記住把握機會，去勻咁多個生日應援點同姜濤慶生啦！
