【Viu】唱作歌手黃劍文（Kimman）今日出席關注國際精神健康活動，有感疫情期間抑鬱數字創新高，Kimman自爆佢都有2、3個星期突然對所有事都冇晒動力，特別零收入真係影響佢最大，入不敷支情況下既擔心又大壓力：「呢個係我2022年第一個公開活動，今年嚴重啲，真係停晒工作。」好彩身邊一直都有班fans支持住佢，叫佢多啲開live唱歌，同時Kimman得閒又會煮吓飯仔、行吓山輕鬆吓，盡量保持心境開朗。
開心番就即刻有個好消息宣布，就係Kimman準備出歌啦！佢預告今年預計會推出3首歌，希望可以儲齊啲歌再出EP，又透露4月會拍MV。雖然所有嘢都要自資，但佢感謝MV嘅合作伙伴收朋友價，壓力都冇咁大，問到會唔會考慮簽唱片公司有「靠山」？佢笑話：「如果有公司簽我先算，哈哈！造歌當然有資源係好，但都好enjoy自己做嘅！」
