【Viu】周家怡喺ViuTV原創劇《反起跑線聯盟》飾演單親媽咪Venus，賢良淑德到連自己都嗌唔似，講對白把溫柔聲仲嚇親導演添呀！佢又大讚劇中兒子Billy生性又可愛，搞到自己都心思思想生仔，可惜苦無對象，仲自爆父母超擔心佢嫁唔出，身邊所有男性朋友都被父母追問過，但家怡就覺得身多自在，成世唔結婚都冇所謂，啱呀，邊個話女人一定要結婚呢？
講到首次同ERROR成員合作，家怡大讚肥仔同娟姐係片場開心果，自己亦有留意MIRROR同ERROR呢班新偶像，讚Edan唱歌有電力；Anson Lo演戲有可塑性，希望有機會合作之餘，最緊要唔係演「登神」媽咪，真呀，識揀梗係揀同「登神」演姐弟戀啦，係咪先？
