【A&M Diary】太子一向係平民美食嘅集中地，而憑住正宗嘅越式風味同親民價錢嘅越星餐廳就成為我哋嘅越菜之選。越星餐廳由鮮甜嘅牛骨湯底到香脆嘅小食炸物，都極具越南地道特色，絕對係太子區內性價比極高嘅隱世越式口味。
越星餐廳：炸蝦餅
越南菜嘅小食又點少得炸蝦餅呢！越星餐廳嘅炸蝦餅即叫即炸夠晒熱辣辣，口感結實充滿大量蝦肉，鮮甜又彈牙，加上甜酸醬一齊食就更加match。
越星餐廳：濱海伴豬肉卷
越星餐廳有香港少見嘅濱海呢！而所謂濱海其實係越南一種非常獨特的米製品，口感更幼滑，加上烤過嘅豬肉卷，食落更脆口，而內裡則鮮嫩多汁。建議加上魚露一齊食，更添一份清新嘅感覺。
越星餐廳：牛三寶湯河
食越南菜當然唔少得一碗pho啦！越星餐廳嘅牛三寶有齊生牛肉、牛丸同牛𦟌。生牛肉嘅肉質軟滑，生熟度剛好，而且肉味非常香濃；牛丸非常彈牙，咬開隨即爆汁；牛𦟌嘅肉味更香濃，絕不比生牛肉遜色。
