【A&M Diary】荃灣可以話係香港嘅美食大本營，餐廳選擇非常多，除咗連鎖店之外，市中心嘅地道街坊小店可以話係呢區嘅特色。其中以越南菜作主打嘅小越廚，以家庭式經營，店面唔大，但出品認真唔馬虎，充滿越南特色嘅小食、牛肉粉都有，啱晒我哋口味，填補我嘅荃灣美食地圖上嘅越南菜餐廳推介。
小越廚：燒豬頸肉
小越廚嘅豬頸肉燒得乾身，除咗醃得入味之外，燒好嘅豬頸肉亦加上孜然粉等調味，令豬頸肉本身嘅基底已非常惹味。亦可以加上秘製醬汁，令味道層次大大提升。至於豬頸肉夠爽口，口感同樣豐富。
小越廚：越式小食拼盤
小越廚嘅小食選擇多，叫拼盤就可以乜都試吓！越式春卷、串燒、魚餅同牛油雞翼，上枱嘅時候，全部都新鮮熱辣。我哋就特別鍾意越式春卷，炸得非常香脆，而且餡料豐富，口感一流；至於牛油雞翼即叫即炸，外脆肉嫩，而且大大隻，夠晒滋味。
小越廚：火車頭湯檬粉
火車頭當然係以配料多取勝！大量嘅生牛肉，夠熱湯浸熟，肉質特別嫩滑；至於熟牛肉則以肉味香濃作賣點，兩款牛肉分庭抗禮，同樣充滿特色。另外，仲有爽口彈牙嘅牛丸，非常juicy，都不甘示弱。最後，小越廚嘅檬粉份量十足，麵質爽口，掛湯能力一流，將火車頭湯底嘅精華送晒入口。
小越廚：青咖喱豬頸肉飯
豬頸肉嘅肉質同樣爽口，而加上青咖喱同樣好match！小越廚嘅青咖喱唔會太辣，除咗咖喱之外，仲有唔同嘅香料味，充滿層次感，送飯真係一流。
