【A&M Diary】過年同A姐嚟太子辦年貨，買定水仙，為屋企增添過年氣氛！買完花之後，喺太子都有唔少餐廳選擇，我哋就嚟到十六座車仔麵，呢度以公屋為裝修格局，細心啲睇，連電掣都係行懷舊路線，而且車仔麵係親民價錢，夠抵食款式又多！
懷舊四品麵餐
講起最抵食嘅選擇，當然就係懷舊四品麵餐，配料有雞翼、魚蛋、豬紅同通菜（本身係唐生菜，但今日貨未返，所以改為通菜）。雞翼滷得好入味，大大隻；魚蛋係陳皮魚蛋，好有口感！至於麵底就揀咗米粉，加上辣汁，好惹味。
四餸車仔麵
A姐碗車仔麵就揀咗呢度嘅名物，包括限量金沙青、五香蝴蝶腩、咖喱麵筋同豬皮。金沙青比較肥，所以佢就唔係太鍾意喇，不過，我又覺得唔錯，肉質嫩滑，肉味香濃；蝴蝶腩好有口感，腩肉鮮嫩；而咖喱麵筋同豬皮都索晒辣汁，味道濃郁。
咸檸檬梳打
四品麵餐同四餸車仔麵都會贈送一罐咸檸檬梳打，食完辣汁，飲番罐梳打就夠晒爽。
