【A&M Diary】放工就最好食放題，盡情享受工作辛勞後嘅美食，無壓力下想食乜就食乜，但講到尾最緊要係高質好食！位於鍋鑼灣嘅尚鮮日式燒肉漁市場就係一間A姐M佬推介嘅放題餐廳，款式勁多：燒烤、刺身、壽司、天婦羅等等，連和牛都係任叫任燒，入口即融嘅感覺，正呀！
浜燒蠔海鮮拼盤
坐低之後，店員就會送上一份拼盤：扇貝、生蠔、鮑魚、虎蝦、甲羅燒。扇貝鮮甜彈牙，加少少鹽令味道大大提升；生蠔燒到表面乾身，但咬落去勁多汁，好新鮮；鮑魚同虎蝦好彈牙，燒完都唔會變韌；而我哋最鍾意就係甲羅燒，蟹膏超多，鹹香惹味，鮮味十足！
精選和牛
和牛有8個選擇，坐低之後，店員就會將8款和牛先上枱，試完邊款啱你心意，就可以瘋狂encore啦！
A4鹿兒島黑毛和牛肩胛：肉質厚實，油脂較少
A4鹿兒島黑毛和牛牛三角：油份豐富，肉味濃郁
A4鹿兒島黑毛和牛一口牛：牛味香濃，不過一口牛一向唔係我哋所愛，因為我哋掌握唔到燒一口牛嘅技巧，次次都燒得太老，一係就裏面太生，求教學
A4鹿兒島黑毛和牛肩頸肉：雖然只係A4，但就係其中一款不停encore項目！牛肉薄身，油脂豐腴，牛味香，接近入口即融
A5鹿兒島黑毛和牛薄裙肉：肉味濃郁，油脂唔算多
A5黑毛和牛外腹肉：追求健康，相對少油份可以選擇呢款
A5鹿兒島黑毛和牛貝身肉：油脂比例適中，肉味香濃，軟腍又無筋
A5鹿兒島黑毛和牛牛小排：另一款瘋狂encore嘅和牛，油脂分佈極高，入口即融
厚切牛舌
食燒烤又點得牛舌，牛舌有三款口味，再分為厚薄兩種口感，共有六款選擇。燒烤嚟講，我哋就鍾意食厚切嘅牛舌，非常有口感，肉質爽口，夠晒入味。
雞翼、豬頸肉
除咗和牛，呢度燒烤嘅選擇都唔少，我哋就叫咗雞翼同豬頸肉，燒到微脆，好滋味。
刺身
除咗肉類，呢度嘅刺身選擇有三文魚、鯛魚、北寄貝、帶子、八爪魚、甜蝦、赤貝、蠑螺、甜蛋、蟹柳等，款款都夠晒新鮮，特別鍾意赤貝，大塊厚身，好鮮甜。
壽司、日式小食
亦有軍艦壽司、手卷、日式小食。
飲品
飲品櫃可以自取飲品，選擇都唔少，仲有好多無糖嘅茶類選擇。
