【A&M Diary】Donki進駐香港令一眾香港人可以一解思鄉嘅心情。近日，喺荃灣海之戀更開設Donki全球第一間嘅壽司店，呢間鮮選壽司自開幕以嚟一直都大排長龍，絕對係近期人氣大熱之選！但亦有一班食客表示食完之後非常失望，所以我同M佬就嚟到鮮選壽司，睇吓係唔係真係咁令人失望啦！
今日係平日午餐時段，排隊時間大概為一個鐘。喺等候嘅時候，我同M佬都有一個問題，乜平時Donki賣嘅外賣壽司係主打高質咩？點解啲人嚟到鮮選壽司會覺得失望呢？所以我哋對於鮮選壽司其實無太大期望，以平常心嚟同大家報導一吓。
首先，聽過身邊嘅朋友話，呢間鮮選壽司出貨好慢，甚至會漏單，但可能我哋係午市時段，呢個情況並無發生係我哋身上。
我哋兩個人叫咗八碟壽司。
日本產帆立貝壽司
真心推介呢度嘅帆立貝壽司，大大粒，非常鮮甜，所以我哋食完之後，再encore咗一碟。
藍鰭吞拿魚壽司三點
三點分別係赤身、中拖羅同大拖羅，非常抵食，特別係有大拖羅，魚身油份豐富，非常驚喜。
厚切大拖羅
呢款大拖羅因為係厚切，食嘅時候油份喺口中迴盪，真係唔捨得吞落肚呀！
厚切三文魚壽司
三文魚都算新鮮，不過不失。
蝦三點壽司
平時食蝦，最鍾意係有膠口嘅感覺，但嚟到鮮選壽司，呢三款蝦都未有呢種感覺。
赤貝壽司
呢個赤貝就真係差啲啦，赤貝呈現淡黑色，唔知係咪唔新鮮呢？
