【A&M Diary】近年，日本有唔少拉麵名店喺香港開設分店，過江龍嚟到香港嘅一幻拉麵，主打濃郁蝦汁湯底，一直都係我哋嘅至愛！今次特登嚟到新開張，位於荃灣嘅一幻拉麵分店朝聖，因為呢度有荃灣獨家限定嘅黑蒜蝦湯，身為拉麵控嘅M佬，又點會錯過呢！
招牌蝦湯拉麵
每碗拉麵都係即叫即煮，先將蝦油、豬油、蒜蓉同薑蓉爆香，最後放入拉麵同加入濃郁蝦汁湯底再上枱。呢度嘅蝦湯之所以濃厚又鮮甜，全因每日用至少50kg蝦頭熬煮而成。配料方面除咗叉燒同溏心蛋，最特別就係用上紅薑、蝦油炸到脆卜卜嘅蝦味麵酥，以及蝦頭磨碎炒香嘅蝦粉，令到蝦味更豐富。加上拉麵非常掛湯，濃郁嘅蝦味喺口腔迴盪，好好味呀！
黑蒜叉燒蝦湯拉麵
繼屯門分店獨家限定嘅咖喱蝦湯湯底之後，荃灣分店亦推出期間限定嘅黑蒜蝦湯湯底！黑蒜無大蒜嘅刺激味道，反而帶有酸甜香味，加上日本黑蒜油點綴，令湯底充滿蝦同黑蒜嘅濃郁甜香味，令味道更有層次！
甜辣甜蝦椰菜沙律
呢個前菜好好味呀！蝦乾甜甜辣辣，加上酸酸哋嘅沙律醬，好開胃好惹味。
