【Now新聞台】截至早上11點，1小時內《彭博》用戶關注度上升最多港股，依次為微盟集團、合景泰富、舜宇光學、聯想集團同紫金礦業。
微盟去年轉蝕超過11億人仔，股價今日捱沽，一度挫逾17%，低見18.32元，錄得上市以嚟最大單日跌幅，中午收市報18.42元，跌逾16%。
微盟係今朝表現最差科指成分股，但仍有大行撐，上調目標價兼繼續叫買入，主要理據係公司SaaS(軟件即服務)業務收入增長強勁，睇好明年可以扭虧為盈。
英皇證券銷售部副總裁林建華都認同大行理據，因為微盟只係帳面虧損。不過，佢話微盟之前估值太高，預期未來1年，股價都未必上得返33.5元嘅1年高位，又提醒高位有貨嘅投資者，可能面對重重沽壓，亦唔建議依家撈底。
