【Now新聞台】截至早上11點，1小時内《彭博》用戶關注度上升最多嘅港股，依次為龍源電力、澳博控股、ASM太平洋、中銀香港、信義光能。
內地能源局日前「吹風」，畀風電及光伏發電加入國家電網，但相關企業要減少，甚至放棄補貼先可以成功「上網」，消息震散新能源股。
風電股龍源連續兩日居於榜首，今朝股價繼續插水，半日跌近13%，報9.24元。至於排第5位嘅光伏股信光跌勢更急，三日累跌近20%。
英皇證券銷售部副總裁林建華指，喺「十三‧五」同「十四‧五」規劃大力支持新能源發展下，依家當局態度冇變，但就要企業蝕住做，相信會影響呢啲企業嘅盈利，但佢認為，股價大冧係股民回歸理性嘅結果。
Anthony提醒，炒燶國策前車可鑒，開始時國家扶持產業會有甜頭，但通常股份造好一排，當局就會話要規管行業，股價就冇晒支持。
