【Now新聞台】截至早上11點，1小時內《彭博》用戶關注度上升最多嘅港股依次為，滔搏、石藥集團、信達生物、中國銀行、國泰航空。
隔晚Adidas季績表現好過預期，做Adidas分銷商嘅體育用品股滔搏、寶勝國際，今朝分別升超過10%及14%，兩隻都唔係體品股龍頭，點解會炒到飛起？
耀才證券研究部副經理譚智樂指，滔搏喺內地嘅業績，對上幾季都唔及Adidas，反映外國品牌可以自行進軍內地市場，內地分銷商長遠一定會賺少咗。近排資金轉炒估值殘嘅股份，所以滔搏股價就炒高咗。
譚智樂認為，寶勝今日公布2月經營收益按年飆近7倍，令投資者對滔搏下星期出爐嘅全年業績有憧憬，佢又話，短期滔搏可以靠實體分銷網絡增加收入，股價或可炒返上13至14元。
