【Viu】Jason陳柏宇為慶祝入行20年，舉行一連三場紅館騷《Jason Chan Live in Frames 20週年演唱會》今晚開唱！老婆Leanne符曉薇拖住「大學生」細女Audrey現身，江若琳、蕭唯展、小肥、張紋嘉、林子傑、鄧穎芝一齊睇騷撐老best！
喺正式開唱前，全白look嘅Jason率先上台，行到兩邊天橋位置同fans握手，一嚟就派福利勁識搞氣氛！頭場嘉賓就係上星期先喺同一地方開演唱會嘅MC張天賦！二人驚喜合唱《命案》x《小心地滑》，「雙人肉行走CD」battle靚聲大癲！佢哋話有呢個crossover係受網民啟發，嗰位網民有taste呀！
見陳伯同MC中間隔幾個身位咁，原來MC自爆有啲唔舒服，驚傳染畀陳伯！佢哋仲講到相識因由，竟然係因為打羽毛球？之後又講埋電單車經添！為咗答謝MC做嘉賓，陳伯專登準備咗份無形禮物送畀MC，就係唱咗《一千種戀愛》，搞到MC鬼咁冧豬豬！最後陳三歲、張三歲影咗張全世界隔得最遠嘅selfie，MC神嚟一句：「其實我哋身高差唔多嘅，唔使踎！」令全場爆笑！
陳伯成晚唱咗超多好歌，有新歌《舊酒新瓶》、《尊嚴》，喺Encroe環節就唱咗《親愛的仇人》、《航拍》、《別來無恙》，陳伯喺唱《航拍》嗰陣仲拎住部相機，走勻全場同fans selfie，勁hyper！另外，炎明熹、蘇永康、張敬軒、古巨基、小肥等則送上花籃祝賀，先去片聽陳伯唱歌！！
