【Viu】MC張天賦一連五場嘅紅館騷《張天賦E=MC² 演唱會2026》今晚開唱！唱到中段，MC換上一身白馬王子look走勻4面邊唱《Good Time》邊同「賦二代」影大合照，直落升到半空唱《世一》，正到暈呀！不過臨尾張三歲都係被嚇一嚇，笑爆嘴呀！
Day 1嘅「盲盒」開出「華納三寶」之一陳蕾，二人合唱《永久損毀》，兩把靚聲夾埋令全場賦二代集體耳朵「懷孕」！之後MC就同蕾子話當年，首次見面係打邊爐局，蕾子自爆對MC嘅第一印象係口花花，究竟MC做咗啲咩？
蕾子為幫MV爭取多啲時間換衫，即時開咗個talk騷，堅係唔話得呀！佢揚言近年見證MC由男仔變成輕熟男，仲話鍾意睇MC做嘅訪問，因為夠真誠，但依然都係張三歲！最後蕾子送返《凡星》畀老best，背後藏sweet爆原因！
MC騷前曾預告紅館騷會有大量視覺驚喜，果然勁猛料！成架校巴剷入紅館舞台，配合爆破、煙花effect，大製作咁款！大露麒麟臂嘅Rock look MC，孭住結他企上校巴頂，自彈自唱《Ain’t No Fool》、《第二人格》，型到地裂、charm到核爆！
