【Viu】舞台劇《你好，打劫！Return》即於8月公演20場，日前一眾演員包括麥沛東、芯駖@COLLAR、巢嘉倫，以及新加入嘅DEE何啟華、Peter陳湛文、Romeo王俊傑，同升任導演嘅Simon魯文傑進行首次圍讀，身為出品人嘅劉德華亦現身打氣。雖然首次齊人，但大家默契十足，現場充滿歡樂氣氛。
大家對元老演員麥東喺劇中一口氣唸出嘅「消費論」印象尤深，排練時已經拍掌叫絕，劇團將片段放上網後點擊超過370萬，可見貼地話題好有共鳴！而芯駖嘅自轉式舞姿亦成網上佳話，連麥東都嘆為觀止。上次公演時捧場嘅阿Dee同Peter異口同聲話：「我哋見到芯駖跳得咁精彩，都想跳埋一份！」麥東即時歡迎一齊共舞，仲踢爆上次排練時，佢瞓喺地下，差啲俾跳得好投入嘅芯駖踩中，好彩自己眼明手快縮手，笑言逃過一劫。
麥東坦言「消費論」呢段演出落咗唔少苦功，但每次上台仍有壓力，不過收到風呢段戲可能會加入新元素帶俾觀眾驚喜。芯駖就話新成員加入起到衝擊作用，圍讀交手已感受到另一番節奏感。Peter同Dee則表示翻睇齣劇好多次，「會加緊追上大家步伐！」
有好一段時間冇擔任舞台劇導演嘅Simon，坦言有一定壓力，但經過圍讀後大家嘅投入同交流，令佢好似打咗支強心針，深信會將劇本推進到更精彩嘅版本。佢亦提到巢嘉倫喺今屆香港舞台劇頒獎禮贏得最佳男配角，而新人王俊傑靠自己努力爭取演出機會，新舊演員共冶一爐，大家都會付出十二分精神演出！
