【Viu】由朱栢謙執導，朱栢康、魯文傑、麥沛東、李芯駖@COLLAR、巢嘉倫、黎逸正等主演嘅舞台劇《你好，打劫！Reunion》12場演出圓滿閉幕，出品人劉德華噚日晏晝尾場再度現身參與謝幕，答謝大家支持！華仔向台下觀眾講：「我哋呢班人，喺適當嘅時候會對住你哋荷包講：『你好….打劫！』」暗示大家隨時再度公演！華仔喺完場後逐一同導演及演員們擁抱，感謝大家落力演出！
芯駖多謝一班隊員對佢呢一個新手嘅包容同鼓勵！芯駖嘅角色設定係每場都要情感大爆發而嚎哭，但佢完場後成個人變得鬆弛，佢話：「演最後一幕嘅時候已經喊乾晒眼淚！開場前反而想喊，因為12場咁快就完咗，好唔捨得。自己第一次參演舞台劇，可以遇上一班咁好嘅班底，好難得！」
麥沛東被問連續12晚摑芯駖會唔會心痛，佢唔好意思咁講：「其實係13巴，其中一晚連摑兩巴。唔單止心痛，而且仲好驚，因為有朋友問我會唔會擔心收到fans刀片？但心駖演嗰場戲感情澎湃，我都要情緒爆發，忍唔住要摑佢。我曾經同導演講不如由芯駖掌摑我，因為我塊面大啲安全啲，發生意外機會率會低啲。」
一段日子冇演舞台劇嘅朱栢康都感激遇上呢班好對手：「隔咗咁耐再返舞台，今次遇上呢班志同道合嘅對手，大家唔單止可以一拍即合，令到我有再次享受舞台演出嘅感覺，好正！」
另外，兩位導演朱栢謙、張志敏都高度讚揚首次演舞台劇嘅芯駖，雖然一切由零開始，但佢好努力！朱導更爆芯駖喺排練中段時，因為壓力大出現脂肪量、肌肉量、體重同樣跌嘅情況，令人心痛！
陳家樂、連詩雅、錢嘉樂、湯盈盈、劉天蘭、Day@COLLAR、駱振偉等喺噚晚捧場，大家不約而同大讚演出節奏明快，陳家樂特別欣賞導演設計上嘅巧妙安排，就係由演員聲演多個角色，由6個演員扮演咗9個角色。家樂見到台上演員嘅互動都令佢大開眼界！
