【Viu】Ivana王菀之與台灣樂團蘇打綠日前喺會展合作舉辦音樂會， 馨儀喺台上表示多謝Ivana邀請，亦話對方會將自己搞到好忙，「我們認識菀之二十年了，要不是菀之把我們從渾水中吵醒，我們應該已經開始休息了！」Ivana分享首張國語專輯係同蘇打綠合作，仲懷念當時喺台灣夜巿不停食食食！
後來，Ivana與青峰選唱方大同嘅《好不容易》、《Nothing To Say》，青峰表示：「唱這兩首歌非常艱難，要控制好情緒。」Ivana強忍淚水表示：「對上一次和青峰同台，還有一位，他就是我們的好朋友方大同。」 青峰續指：「我們各自挑了一首歌，就是想要唱給他聽。」之後兩人合唱《你被寫在我的歌裡》時，青蜂將「愛呀」兩個音玩出多個花款，令Ivana不知所措，非常搞笑！
完騷後，Ivana話每一次都好珍惜同蘇打綠合體，又希望可以再一齊做唱片！講起唱方大同作品，Ivana話喺排練時都覺得對方好似仲喺度。佢都直認唱完後眼濕濕，「好掛住方大同，好掛住佢嘅音樂，原來都一年，好想問候佢媽媽，亦都好想所有樂迷繼續聽佢嘅歌、生活裡面仍然都係充滿方大同。」
今次Ivana同蘇打綠喺台上嘅互動相當搞笑，被問到會唔會再請蘇打綠做上海站巡唱嘉賓時，Ivana笑言：「真係未諗呀。」 對於澳門站嘉賓張敬已被率先爆出，Ivana笑言：「唔知喎， 好多人都爆好多嘢出嚟，有啲係、有啲唔係咁樣。」
