【Viu】舞台劇《SUCK樂園》噚晚喺演藝學院圓滿落幕。Ivana王菀之、AK@MIRROR、Rosa韋羅莎、白只、阿卵楊偉倫同埋童童蔡曉童連同一眾幕後人員謝幕，現場掌聲如雷。圈中朋友陳凱詠、陳穎欣同埋MIRROR嘅Jeremy同Tiger都有捧場。
「小電兔」AK獲編劇兼導演阮韻珊點名讚賞，指佢即使腸胃不適，仍堅持投入綵排，非常敬業！對於演出結束，AK表現得依依不捨，「感覺一切發生得好快，由排練到完騷好似眨吓眼就過咗一樣。好衷心多謝大家俾我參與呢段旅程，作為舞台劇初哥，呢班對手真係好錫我、好有愛，多謝大家！」佢表示最鍾意「巴膠」呢個角色，因為可以俾佢盡情釋放內心嘅小邪念，AK又希望未來有機會再演舞台劇，更想挑戰一啲只演一個角色嘅作品。而被觀眾大讚演技進步嘅童童則謙虛回應：「大家太過獎啦，最緊要係大家睇得開心！」並笑言演舞台劇就好似細個喺公園玩捉迷藏：「要湊夠人一齊玩係唔容易，好開心今次呢班人陪我玩咗一場咁開心嘅Game！」
Ivana笑指自己「長大了」，回想起廿幾年前初接觸舞台劇時，每次演出結束都會激動落淚，家陣就學識將不捨轉化成美麗回憶。白只則指今次同Ivana有大量對手戲，又希望未來再有合作機會，Ivana搞笑話同白只之間「好似一齊成長，但又一齊多咗啲年紀。」又打趣話：「唔想講個『老』字啦，我哋以前係演妹豬，而家已經要做人哋爸爸媽媽喇！」
至於同阿卵合作無間嘅Rosa，笑指對方每一場戲都令佢印象深刻。而阿卵坦言最不捨得嘅係劇中嘅吉祥物造型「笑笑兔」，甚至諗過將戲服帶返屋企珍藏添！
