【Viu】電視劇《絕命法官》即將播出，今日一眾演員張家輝、胡杏兒、張兆輝、謝天華、鮑起靜、Cecilia蔡思韵、朱栢康、谷祖琳、曾向鎮、周漢寧、駱振偉、冼康正等，曬冷現身深圳記者會！家輝事隔20年再拍劇，佢指作出咗好多新嘗試，並坦承係被改編自以色列劇集嘅劇本所吸引！劇中飾演法官嘅家輝，劇透為維護做錯事嘅仔，最後會走向黑化！未知家輝今次會唔會沿用「蔡辛強」嘅宣傳方法，喺Threads上開account同網民互動？
而飾演家輝個仔就係曾向鎮，佢指接拍前都未知係同咁多位前輩合作，笑話一開始同「爸爸」家輝對戲都有啲壓力㗎！唔止法官嘅對白難背，杏兒話佢啲台詞都一匹布咁長，因為演警察要匯報案情，揚言拍文戲比打戲更困難！
家輝繼《贖夢》後再開金口唱主題曲，係因為有money就有talk？現階段有兩首歌揸手，有信心攞最受歡迎男歌手？杏兒又自爆喺片場有唱歌舒緩家輝嘅緊張感，呢招唔知work唔work呢？
有指家輝之後會孖鍾雪瑩合演喜劇「救市」，但呢日家輝澄清係公路溫情電影嚟嘅，二人係咪喺烏甸尼遠東電影節結下合作緣？嚟緊仲有《激戰2》，家輝是咪會再操到啲肌肉嚿嚿分明？
Cecilia劇透演家輝徒弟，初次同「師父」合作大讚佢勁nice，喺片場零隔膜，男友劉俊謙亦有預先叫佢同家輝相處可放輕鬆！阿寧自爆今次演嘅角色係從影以嚟最慘，有好多情緒激動嘅位，終極劇透會被電單車所傷！雖然「傷痕累累」，但阿寧開心話喺呢次拍劇可盡情向「雙輝」張家輝、張兆輝加Cecilia偷師，袋咗勁多錢落袋呀！
另外，Cecilia亦指背對白係挑戰之一，最長有成4版紙嘅台詞！不過佢下一部嘅韓國電影就零對白，苦練手語演聽障人士，依家進度如何？累積多次做「媽媽」經驗嘅佢，ready好生小朋友未？初次體驗韓國拍攝文化感受如何？想知就去睇足本訪問啦！
