【Viu】張家輝今日化身電影《贖夢》中角色「蔡辛強」現身廟街擺檔，聽脆友分享惡夢。噚晚蔡辛強喺Threads「吹雞」，話惡夢分享會今日黃昏6點開始，而5點就會派30個籌。但由於強哥Fans無數，未到5點已派晒籌，排頭位嘅23歲男忠粉Kcyc，4點已嚟霸位。
強哥可能最近頻失眠，瞓唔著咪早啲嚟囉，5點半就到咗現場，但都不忘買最愛嘅叉油雞飯放上枱，仲用兩隻筷子插住添！家輝全程Keep住強哥Mode講嘢「鬼食泥」咁，同埋一副「便秘」樣，但間中都「焗蟹」忍唔到笑。不過強哥聽人講鬼故愈聽愈Hyper，仲加鐘半小時，滿足多10個冇籌嘅脆友。
臨走前家輝繼續以強哥Mode同小編講，話好攰，仲要趕住揸夜間的士。咁噚晚有冇發惡夢？想Feel下蔡辛強有幾精神錯亂？入嚟睇現場實況片咪知囉！
