【Viu】張家輝自編自導自演嘅電影《贖夢》，上畫至今連續四天成為票房冠軍，截至噚日票房已達330萬港元。過去一個週末假期，家輝帶住劉俊謙、朱晨麗、李凱賢、許恩怡、袁富華、袁綺雯等演員，馬不停蹄地謝票超過40場！過程雖然有啲疲累，但家輝好開心聽到觀眾近距離同佢分享觀後感，並坦言大家入場睇戲睇得投入，係佢哋最想睇到嘅畫面，家輝又分享話：「其實呢齣電影唔係咩嚇人嘅鬼片，只係題材上有一啲驚嚇嘅原素配合，我都唔希望大家因為被嚇怕而抗拒睇呢類電影。」佢表示樂見觀眾為咗衝破自己，買飛入場連睇兩次剋服心魔！
謝票期間觀眾反應熱烈，尤其見到兩代男神家輝同阿謙現身，阿謙仲大派福利，同幸運粉絲溫馨抱抱，冧死「劉太太」！而家輝都唔弱，有粉絲用紙牌手寫對偶像嘅欣賞同愛意，更公然表白心聲：「鑽石與黃金，不及我對家輝真誠與真心。」令家輝當場甜到入心，特登上前握手道謝。
提到「蔡辛強」同網民互動宣傳得到唔少迴響，電影未上已成佳話，唔少觀眾都好期待蔡辛強同文醫生一齊現身戲院，同大家分享自身經歷。家輝同阿謙就異口同聲表示，本身同兩位冇直接聯絡，但已透過相關人士召喚佢哋現身！
除咗電影備受矚目外，家輝所唱嘅電影片尾曲《永遠的失眠》都令大家燒腦，片尾歌嘅魔力加上家輝嘅歌唱實力，令粉絲們主動check紅館期，發現6月連置台仲有9日空檔期，紛紛建議家輝開演唱會。而家輝都認真話：「都可以試吓，到時我應該要定期性練歌，但近排我喉嚨唱歌唱得太多有繭，需要先休息一下再作打算。」
