【Viu】朱栢康憑《破．地獄》勇奪第43屆香港電影金像獎「最佳男配角」，興奮到爆嘅佢喺後台仲Chok甫嚟錫獎，更揚言得獎夢未圓，事關自己仲想攞「最佳男主角」，連「最佳女主角」同「最佳女配角」都想拎㗎！
憑《爸爸》首度提名「最佳女配角」嘅谷祖琳，一擊即中，佢笑言最想去After Party飲酒，事關已經等咗成個月。雖然同阿仔齊齊攞獎，但小谷坦言最難係抽離「金燕」一角，其中要畀阿仔斬殺嘅場口，令佢足足驚咗幾日呀！
至於Dylan蘇文濤則憑《爸爸》勇奪「最佳新演員」，佢坦言喺梁朝偉手上得獎意義非凡，始終由細睇到大，所以宣佈時腦海一片空白，認真可愛！
此外，Robin Lee憑《香港四徑大步走》膺「新晉導演」，直言希望將此片推廣至海外，等大家睇到香港之美。
