【Viu】劉俊謙、伍允龍、張達倫、梁雍婷等今日喺沙田出席 《武替道》首映，今日係伍允龍嘅47歲生日，9月26日亦係阿謙36歲生日，大會特別送上蛋糕，與現場近千fans一齊唱生日歌，場面熱鬧。
伍允龍勁風騷表示好開心咁多人一齊同佢慶祝生日。對於被指有新歡，噚晚帶長髮女子一齊睇林峯演唱會，佢話係認識逾20年嘅教會朋友，今日對方都有同男友一齊嚟睇首映，透露女伴冇嬲，只係擔心影得唔靚。問到脫單係咪今年其中一個生日願望？伍允龍爆笑答：「我每年生日願望都係，哈哈。」咁坦白得唔得架，難怪阿謙都話轉頭要同佢兜番轉，睇下遇唔遇到真命天女。
講返今次呢部致敬80年代武打片，伍允龍表示三大賣點係「劉俊謙劉俊謙劉俊謙」重要事要講3次，其實阿謙今次真係好搏命，除咗同董瑋一齊喺6樓跳落嚟，仲要不停捱打，但佢更擔心係打傷人。阿謙喺台上指希望票房破3千萬，咁係咪每1千萬派一次福利？阿謙工作冇停手，月底生日有冇機會同女朋友蔡思韵一齊慶祝？首度入圍金鐘獎爭視帝，阿謙會唔會視吳慷仁為勁敵？佢話做創作唔會咁諗，「得到肯定已經開心，但唔係賽車手要鍊低你，諗法唔好。」想知更多記得睇足本訪問。
