【Viu】恭喜恭喜！由古天樂、林峯、劉俊謙、伍允龍、胡子彤、張文傑等主演嘅電影《九龍城寨之圍城》，今日（11日）港澳總票房正式衝破1億港元，演員們總動員拍片謝票。電影喺香港獲超過145萬人次購票入場支持，由5月1日正式上映至今，連續41日成為香港單日票房冠軍，有望挑戰港片票房第一位嘅《毒舌大狀》。
噚日古仔孖林峯、張文傑現身謝票場，唔少觀眾都係古仔Fans，有人問古仔派乜福利，佢笑住口問：「係咪玩嘢呀？」但承諾會派福利；另有來自內地觀眾指好多人會叫古仔做「Daddy」，古仔禮貌地用半鹹淡港式普通話回答對方：「爹哋呢個『冥』字，禾是今天第一次聽到......。」引來全場叫父親節快樂，場面爆笑。仲有粉絲即場獻唱《男朋友》向古仔示愛，俾偶像叫唔好搞事，咁開心嘅謝票場面，唔好等即去片。
