【Viu】繼Yoyo岑寧兒後，Jer柳應廷為《一首歌的時間》Project請到嘅歌手，係新歌《約齊靈魂在墳墓開生日派對》作曲人Jay馮允謙，Jay親自解說3年前已諗定寫隻歌俾Jer，喺演繹過《約齊靈魂在墳墓開生日派對》一Take過版本之後，Jay大呼首歌難唱，佢透露公司同花姐都曾經問過點解自己唔Keep返首歌，因為佢覺得Jer無論幾難嘅歌都可以駕馭到！
而Jay嘅新歌《在愛面前投降》都係高難度作品，兩位彷如喺錄音室上演一場高音Battle！Jer分享自己點樣準備，「我用咗一個禮拜時間操熟首歌係咁聽，因為Jay啲歌喺Playlist都會聽到好熟，但呢首因為未出街，prepare嘅時間唔係好多，但係好好聽，係一首好入心嘅旋律。」
兩位對上一次合作已經是3年前嘅網上音樂會，今次喺Studio合作，Jay睇得出Jer多咗好多信心，「因為3年前第一次合作嘅時候，Feel到你有啲緊張，但而家絕對係Relax。」Jer就話：「而家係識得喺緊張嘅時候扮唔緊張，其實內心都好緊張。」又同時讚Jay唱歌超級穩定，「佢寫嘅曲風愈嚟愈有層次同埋味道，特別係佢幫我寫嘅新歌，係好好！」Jay就話成日聽到樂迷代Jer邀歌，希望日後有機會成真。Jay同Jer一齊演出，總係欠缺現場觀眾，佢哋都期待將來有機會嚟一場有觀眾嘅演出咁話！
