【viu】Jer柳應廷推出今年第二首派台歌《約齊靈魂在墳墓開生日派對》，繼續大玩玩味，將自小鍾情嘅荷里活名導添布頓Tim Burton嘅怪誕再次滲入作品中，成為怪誕系列歌曲第二部曲。Jer表示：「呢首係第二首，加埋之後第三首去講一個故事。其實《筆觸男孩憂鬱之死》 & 《約齊靈魂在墳墓開生日派對》都埋藏咗一啲伏筆，希望聽眾可以跟住歌曲慢慢走向故事Ending，就會搵到呢3首歌其實係講咩，大家可以嘗試自己搵出嚟。」
新歌搵嚟Jay Fung作曲、周耀輝填詞，Jer分享咗自己唔少天馬行空嘅想法：「我有講過例如大家覺得惡夢係一件唔好嘅事，發緊惡夢你會好驚，但其實某程度上潛意式醒返之後，你會克服咗啲嘢，我唔想令到大家覺得發完個夢就淨係驚，要有啲得著，可以成就到而家嘅自己。」就係咁，一班靈魂一齊唱歌、慶祝生日派對，呢個完全唔覺得驚嚇嘅畫面，就出現咗喺新歌之中。
為配合歌曲，唱片封套造型都好古靈精怪，妝容上嚟咗個突破，除咗白面，仲有黑淚眼Look，總之就係要有「發惡夢嗰個人嘅感覺」。至於MV，將會不日推出，但Jer揚言一樣要古怪到底，仲分享一個成為足球員喺阿仙奴主場入波嘅情境，想知更多Jer嘅有趣荒誕想法，就快啲loop入嚟睇片！
