【Viu】詹瑞文一共6場嘅單拖喜劇《即興之王》，噚晚喺新蒲崗東蒲胡李名靜體育館正式開鑼。詹Sir每一幕都會化身唔同人物，包括「Lucking哥」、「Cheap GDD」、「關義工」、「Moment 姐」、「Lucky」、「巨星 Jack」同埋「Joker」。佢將呢啲人物嘅「即興精神」發揮到舞台上，令呢個概念被解釋成唔同意義，例如「即興係提醒自己要快樂」、「即興係突破盲腸」、「即興係拒絕墨守成規」、「即興係勇氣」等等，以致故事出現扭轉，分裂出令人意想不到嘅平行世界。最後道出「即興」嘅真正含義係「活在當下」，需要啟動「即興」嘅方法係搵返「童真」，向艱難生活重奪行使快樂嘅權利。
詹Sir今次闊別8年重回舞台，吸引大批藝人朋友到場支持，包括張衞健、陳煒及老公陳醫生、姚子羚、何超儀及老公陳子聰、江若琳及老公Oscar同埋廿四味成員Phat等等。講明係「即興之王」，詹Sir本住「即興之道，想做就做」原則，當然好多嘢都係即興，詹Sir即興同觀眾互動，咁啱陳煒同老公陳醫生、江若琳同老公Oscar，仲有廿四味嘅Phat都分別俾詹Sir抽中上台互動，各人都玩得投入，台下觀眾亦睇得開心！
