【Viu】ViuTV新劇《瑪嘉烈與大衛系列 絲絲》正在熱播中，貼地劇情掀起新一輪嘅追劇熱潮！劇中角色陸續登場，「三人行」Phoebus@P1X3L、「小野」盧鎮業、Buber麥詠楠之間嘅火辣親熱戲，相信睇到大家㷫烚烚！
原來小野、Buber私下為爭奪Phoebus嘅螢幕初吻，都引發連場激戰，火藥味甚濃！唔知呢吻到最後「鹿死誰手」？當事人Phoebus對同日激咀兩輪，享盡男、女之福又有咩感覺？再三強調係100%直男嘅Phoebus，坦言今次接拍後內心抑壓咗好耐，但難得有機會衝破自己嘅心理關口就勇於挑戰！
同樣感到挑戰嘅仲有小野，首次演同性戀者，佢話好難拿捏情感！至於要同Phoebus埋身肉搏嘅Buber，笑嘲自己拍嗰陣硬晒軚，又劇透因為場口要跳舞，就即席向《造星II》冠軍Phoebus拜師，點知被對方取笑？今次3位喺親熱戲上簡直係豁咗出去，為發掘佢哋有更多嘅可能性，試就「濕吻」、「床戲」、「露股沖涼」三個情節，佢哋又會點排序呢？小心睇片笑到有腹肌呀！
