【Viu】樂隊ToNick今晚喺九展開騷，以「只准快樂」為主題，小龜自爆食米線遇見一位20歲妹妹話認得自己，原來妹妹嘅媽咪好鍾意ToNick，引得全場爆笑！是晚，恆仔表現較沉默，獻唱演唱會主題曲《Good Trip in Bad Days》時一度感觸哽咽，話呢幾年經歷好多嘢，但無論開心與唔開心，好多事都要累積埋一齊先係完整人生。之後唱出《長相廝守》、《記得梳頭》，以及歌頌成人電影網站嘅《This AV》等hit歌。
完騷後4子受訪，恆仔透露女友Kylah Chan移民咗去加拿大，所以冇嚟睇騷，表示隊友Ryan要移民時都好唔捨得，有一晚同Ryan講：「你不如唔好走。」咁更何況係女友呢？難怪恆仔都話Long D嘅感情係需要時間去適應。而移英半年嘅Ryan就專登返香港開騷，話估唔到可以Long D夾band，遲啲大家去英國站開show，佢就已準備好喺屋企打邊爐同燒嘢食招呼班兄弟。Encore環節，恆仔見歌迷反應熱烈即除衫騷肌，但叫埋其他兄弟，就個個都淨係話「撐你」，似乎冇乜實際行動，最終恆仔承諾4子如有機會喺紅館開騷就會四個一齊爆肌，到時一定好有睇頭。想睇更多記得loop爆片。
