【Viu】甄子丹同太太汪詩詩、蔡加讚同太太汪圓圓、Gin Lee李幸倪、陳家樂、周家怡、方中信等，今日出席馬場活動!「宇宙最強」丹爺之前喺美國出席奧斯卡頒獎禮，佢坦言喺台下見到楊紫瓊攞影后時，興奮到彈起兼眼濕濕，但笑言要約出爐影后食飯應該要排幾萬人。講到網友發起聯署抵制佢擔任席奧斯卡頒獎嘉賓，丹爺就話每個人都有言論自由，最緊要多啲愛同包容。
擔任表演嘉賓嘅Gin Lee跳唱3首快歌，炒熱氣氛！佢自爆中途跳到腳軟，好彩Fans瘋狂尖叫先頂得住。Gin Lee透露將會挑戰更多跳唱歌，又會同Wyman再度合作炮製情歌，希望儲多啲歌年尾開騷。此外，陳家樂爆未婚妻連詩雅過度減肥，自己都嫌佢太瘦，仲話有請霆鋒嚟飲，唔知佢帶唔帶埋王菲喇！
