【Viu】七師傅呢日帶埋愛人Gerald，齊齊盛裝出席「八大‧尋龍記」慶祝晚宴，風水命理cfu就在行啫，唔知恐龍cfu又曉唔曉呢？點知七師傅失驚無神玩自嘲：「我發脾氣嗰陣都似恐龍咆哮㗎！（對住愛人都會？）一個月一次，好似女人嗰啲咁。」呢一面嘅七師傅都有啲難以想像，講到佢8月嘅兩場九展騷喺活動期間公開售票，七師傅話唔使問阿貴都知唔夠飛賣，亦堅決唔加場，因為太辛苦啦～再提起佢喺記招預告開騷啲衫會好sexy，七師傅「加碼」：「觀眾叫我除就除！冇底線，唔使謹守三點不露，到時大會做醜人話唔畀除，卸個波畀大會～」cfu轉數快都真係唔係浪得虛名！
勁好耐冇見嘅Kenny關智斌就同衛詩雅現身，Kenny笑指既興奮又緊張，仲話之後好想搞fans meeting，因為兩年前出寫真集嗰陣爭落fans簽名會，咁一係今年再出多本然後group埋一齊搞囉？Kenny即刻耍手擰頭嗌唔好：「都幾廿歲人啦～」又自爆ig啲爆肌相只限用嚟呃like，實牙實齒咁話唔會再出寫真集！另外，同場Gin Lee超大方嚟個美背放題，興奮宣布今日（8日）推出數碼專輯，之後12號再出實體版，喺度預祝Gin Lee新碟大賣！
