【Viu】 MIRROR成員最近輪住出solo，相信鏡粉一定開心死啊！今日(6號)就到Jeremy嘅新歌《CLOSER》面世啦！呢首新歌加入西班牙曲風，唔單止輕快仲好有節奏，唔少Unicorn都話聽到想一齊un啊！
《CLOSER》係一首關於男追女，初相遇時帶點曖昧，心情有啲小鹿亂撞嘅直白告白，Jeremy坦言：「第一年Solo已想做類似西班牙輕快跳舞曲風，能夠寫到《CLOSER》好開心！大家可以跟住首歌一齊嗚一齊跳舞。」
為咗MV，Jeremy特登染咗粉紅色頭髮，勁有新鮮感！佢化身美食食評家，喺一間餐廳度偶遇老板娘，對方用魔力吸引Jeremy，將佢迷暈，醒返嘅時候已經走進夢一般嘅碟子世界，二人更慢慢蘊釀出曖昧關係，而喺呢個夢境入面，Jeremy就以一身黑皮褸造型示人，佢笑言：「我要變返Wild一啲，主動吸引返女主角！」舞蹈方面，新歌亦比以往嘅作品性感得多，原來 Jeremy曾經作出多番考量：「嗰種sexy令我有少少擔心，怕做得太Over唔係幾好睇，但後尾搵返個Balance，Sexy得嚟又帶少少Man嘅感覺。」
《CLOSER》係Jeremy拎咗樂壇新人獎後第一首歌，對佢嚟講非常重要，同埋上年啲歌都係比較Dark嘅內容，所以佢希望今年俾一個全新嘅自己大家，簡單啲易明啲，同時亦都想將妖嘅元素加入商業啲嘅音樂入面，可以令到妖嘅Topic更加多人接受。雖然新歌啱啱先推出，但Jeremy已籌劃好今年嘅音樂路，計劃今年出3首唔同風格嘅歌，第2首solo已經著手準備緊啦！
