【Viu】MIRROR紅館騷噚晚第三場，鏡仔團火愈燒愈旺，噚晚佢哋唔需要再擔心舞台安全，因為團隊已經作出咗改善。除咗高空橋部分亦取消埋部分升降機關，喺皮皮Frankie演出期間，中心個舞台已經冇再升高；同時教主Anson Lo喺唱完《King Kong》，向後跌落台底嘅動作都cancel咗，令神徒都定返晒，花姐噚晚仲親自操刀喺Panel指揮，佢話噚日做返好耐冇做嘅野，幾乎驚到暈低，之後會繼續努力。
鏡仔噚晚都不斷repost fans影嘅靚相，睇佢哋喺台上面chok晒樣演出，真係型到爆，不過都有fans捕捉咗好多得意嘅互動。而Miro為咗撐偶像，都齊齊舉起燈牌照住成個紅館，不過鏡仔都呼籲Fans記得團歌先開，當阿Jer唱到《人類群星閃耀時》，Fans就好乖豬熄燈牌，改為揮動手燈造成壯觀嘅藍色燈海，Jer事後都好感動話，多謝大家為佢留下呢幅咁靚嘅畫呀。
