【Viu】Nicky王雍泰同Dickson余德丞，仲有三位「粉紅巴打」Zelos、阿BU、Howard，齊齊為ViuTV綜藝節目《粉紅麻甩101》做主持，睇見呢個粉紅與麻甩嘅組合，真係未開聲就知道有幾嘈。佢哋五個人一齊接受唔同嘅挑戰，試過Gel甲、跳芭蕾舞又著過誇張既服飾，仲食埋會成個男人返曬嚟嘅牛鞭！
除咗主持節目，Nicky而家都有Keep住拍網絡影片，佢前年離開舊公司毛記電視之後，唔少人仍然叫佢龍志權，唔知佢會唔會再做呢個角色呢？而Nicky亦話希望有多啲機會拍劇，如果可以最想同AK演兄弟啊。仲記唔記得Nicky參加《全民造星》時，最後殺入十強去埋美國受訓，當初佢都係大家嘅焦點，Nicky坦言自己唱跳能力不足，最後冇加入男團都好合理。講到唱功，Nicky即刻有啲中學回憶，話說當年嘅一個決定對佢影響好深，而且係佢人生最後悔嘅一件事添。
