【Viu】MIRROR成員Jeremy日前推出第三首個人單曲《阿波羅》，個MV仲落重本飛到日本北海道雪地取景添！噚日Jeremy出活動嗰陣透露MV有4個造型，又有分享拍攝趣事，佢笑話拍嘢嗰度係位於半山收唔到訊號，早咗收隊要企喺路中心等crew車，落到成身雪變「冰波羅」，感覺似等救援隊，期間仲遇到唔少熱心嘅日本人伸出援手；亦初嘗凌晨起身拍日出，Jeremy見到製成品都話好滿意呀！另外，講到佢聯同Jer喺12月有個戶外騷演出，賣大包預告會晒冷三首Solo歌，所以心情既緊張又期待！
同場仲有雙「劍神」張小倫、張家朗，前者最近踩入娛樂圈主持訪談兼煮食節目，更即場邀請師弟做嘉賓，張家朗就梗係想棒場啦，仲大讚大師兄手勢掂添！張小倫又嘲自己變得八卦，因為每次訪問藝人、運動員都要「起底」，感覺好好玩！
