【Viu】Jason陳柏宇順利完成處男亞博騷，甫開騷加咗THE FIRST TAKE元素型爆行入場，一嚟就炒熱全場氣氛！佢坦言出咗TFT嗰兩條唱歌片先full house，所以TFT係功不可沒，希望有機會搞巡唱咁話！
是晚Jason大晒靚聲，一口氣連唱21首歌至encore位先落台換衫，之後上番台唱完大熱歌《你瞞我瞞》，坐低嗰吓又再老貓燒鬚唔記得拉褲鏈，全靠fans提水先即刻拉番，零影響演出執生能力超高！事後陳伯笑嘲自己渣，先長期唔記得拉褲鏈，久而久之仲慣埋，所以依家一啲都唔尷尬，再抵死自嘲「冇咁大抽」、加上入面有底褲唔怕走光！
講起佢不時落台握手冧fans，Jason話唔擔心，因為早排同囡囡Abigail前後腳「中招」有抗體，但好番初期失聲搞到佢好擔心開唔到騷。另外，老婆Leanne 3月就生細囡，再做爸爸嘅Jason話期待、興奮大過緊張，又笑話自己精打細算，第二胎都唔會畀錢剪臍帶！
