【Viu】Cath黃妍噚日為新歌《異地書》加3月嘅個人麥花臣騷宣傳，新歌係首同詞人王樂儀憑書寄意嘅思念歌，佢話起初個思念對象係靠想像，但上年有朋友移民，真實實踐咗份思念嘅感覺。
為強烈表達意念，MV導演落order叫Cath初嘗跳現代舞，自認係老人筋骨嘅Cath一開始耍手擰頭嗌好驚，原來曾經被笑跳舞似耍拳，更自爆身體係毫無節奏感，唱歌打拍子要用到腳趾。最後Cath成功踏出comfort zone，搵老師苦練現代舞半個月，漸漸對跳舞冇咁大恐懼，不過仲未好有信心嘅佢就落閘開騷玩跳唱，反而預告會cover鍾意嘅歌、甚至係未面世嘅新歌！
