【Viu】程人富對上一次戲分比較重嘅劇，已經係2018年拍嘅《教束》，上年佢再參演由無制限OT編集団打造嘅《殺手廢J》，可以話係得償所願。事關富哥一直都好想同呢個夢幻團隊合作，當知道Mike導搵佢拍劇時，連做咩角色都唔駛諗即刻應承喇！今次呢個殺手角色，雖然冇乜動作戲，但富哥都準備秘密武器搶鏡，繼上年喺小薯茄嘅舞台劇後，觀眾再有機會睇到佢騷肌，睇吓佢用咗20日操肌嘅成果喇！平時喺自己Channel，多數以誇張嘅形式演喜劇，今次唔單止要Tune返個energy，仲要喺拍攝時保持角色嘅連貫性，對富哥嚟講都幾大挑戰，喺戲中佢要教Peter陳湛文，點樣喺殺手公司生存；戲外佢就調轉頭，不斷從對方身上偷師學點做感情戲，而佢心目中嘅女主角正正係合作無間嘅童童。
