【Viu】「小薯茄」麗英、男團FINALLY盛裝出席《未來音樂選 TONE Music Awards 2022》，獲提名嘅麗英對攞獎抱平常心，同FINALLY一樣，最開心係喺頒獎禮場合同唔同音樂人交流，然後全部傾合作，啱呀！小朋友先做選擇㗎嘛！
頒獎禮司儀包括有「爺爺」岑珈其、柯煒林同郭爾君，講到爺爺係組合PlayTime成員之一，但佢謙稱自己談唔上音樂人亦未夠資格，雖然鍾意唱歌，但真係冇諗過再出歌。提起幾日前嘅韓國之旅，佢多謝「0+3」先有機會去朝聖，同韓國猛料演員集郵，抵死笑話有以「I am actor」力sell自己！至於就嚟開九展處男騷嘅Gareth.T，優先訂購光速賣晒，佢話開心見大家踴躍支持，不過唔會因為啲飛賣唔賣晒而影響表現，又講明唔會再加場，驚太攰頂唔順，正努力排練、戒口準備！
