【2022年11月20日】 Gareth.T 湯令山一連三場個人演唱會，前晚喺九展正式開鑼！頭場第一位嘉賓就係Gareth老友Tyson Yoshi，佢哋仲著到成對Twins咁齊齊晒麒麟臂！而今次演唱會，無論舞台設計以至演出Rundown，都打造到好似舞台劇一樣，中間仲有中場休息，所以Gareth都請嚟小薯茄嘅麗英同程人富幫手做串場嘉賓，真係有驚喜喎！
嚟到演唱會第二晚，Gareth 就請嚟繼女朋友moon tang之後，佢最喜愛的華納歌手Janice衛蘭同妹妹阿Jill衛詩擔任嘉賓，一齊合唱《Peaches》。至於點解揀呢首歌，佢話因為Tyson哥哥之前話佢係香港Justin Bieber，所以呢晚就演唱佢自己改編過嘅版本，Janice同Jill仲為Gareth送上Air kiss添！而噚晚另一位嘉賓就係COLLAR成員，兼Gareth新歌《笑住喊》MV女主角阿Day喇！佢一身性感Tube Top上陣，搞到Gareth都怕佢凍，話要除件外套俾佢暖暖啊！估唔到Gareth唔止大隻咗，連個膽都壯埋，乜女朋友噚晚冇監場咩？小心返屋企跪玻璃啊！
