【Viu】 BabyJohn 蔡瀚億喺ViuTV新劇《大誠實家》入面，飾演好似食咗誠實豆沙包咁只講真話嘅傳銷公司老闆盧文乃，Asha徐㴓喬係佢老婆張若玲，至於Dee哥何啟華就飾演林放虎，謀咗阿乃嘅事業同家庭，雖然佢哋之前話齣劇有好多爆肚，其實一班演員早喺拍攝前兩個月就反覆圍讀，將對白度到最精警，亦排到滾瓜爛熟，當中嘅角色對佢哋每個人都好有啟發，例如盧文乃提醒BabyJohn要珍惜當下所擁有嘅嘢，林放虎就令Dee哥諗起一段中學時期做傳銷嘅回憶⋯Asha主持工作就做得多，近兩年先開始接觸演戲，今次佢遇著兩位拍攝經驗豐富嘅拍檔，真係大把嘢俾佢偷師，而BabyJohn同Dee哥仲分享埋俘虜女人心嘅方法添！
