【Viu】臨緊農曆新年，又係賀歲片晒冷嘅時候，《毒舌大狀》噚晚舉行首映禮，黃子華、林保怡、謝君豪、王丹妮、Fish廖子妤、栢天男、楊偲泳、谷德昭以及導演吳煒倫等由醒獅帶領霸氣進場，身在馬拉嘅阿Dee都有出ig story宣傳。久未露面嘅林保怡受訪期間承諾遲啲會見多啲大家，又祝《毒》票訪破舊再創高峰，收九千萬、破億甚至破埋《阿凡達：水之道》！老友子華神亦許願希望有日港產片會打破西片票房！
講到Do姐為另一套賀歲片《超神經械劫案下》友情聲演，仲放風話有興趣拍戲，身為舊拍擋嘅子華神搞笑話對方要求高，唔似佢哋呢啲凡夫俗子咩到接，又話求Do姐出山好難，之但係若果係Do姐開聲話拍就即刻第二日開工！
至於提起Fish喺ig post咗張同子華神嘅舊照，子華神笑話人生真係有奇蹟，點估到fans會做咗自己阿媽（《飯戲攻心》內劇情），兼大讚對方前途無可限量！而Fish興奮話可以同到偶像二度合作更榮幸，希望陸續有嚟咁話！另外，王丹妮老公羅孝勇亦有份演出《毒》，不過兩公婆冇同框機會，王丹妮笑斥老公夾埋外人一齊害佢，睇吓下次有冇同框機會晒恩愛啦！
