【Viu】林明禎今日着到成個公主咁，喺旺角出席自拍館開幕，大會安排佢即場示範三個cute爆甫士，甜美程度令圍觀嘅男男女女都心心眼。明禎話細個都好鍾意睇公主電影，大個就鍾意睇超級英雄片，最想做女版Iron man。
佢嚟緊聖誕同新年都會喺香港，雖然要喺工作中渡過，不過佢話：「我好開心㗎，同埋屋企人新年後會過嚟，到時我會帶佢哋去玩。」問佢有咩聖誕願望，明禎話經過呢幾年，身體健康最重要，之後係屋企人，男朋友嗰啲可以擺最後。講到佢未有參與《飯戲攻心》舞台劇版，明禎話到時演出都好想去睇，仲話好想試吓參演舞台劇添。
