【Viu】Michael C同埋師妹Paula區子琳，最近分別推出新歌《雙重標準》同埋《抹去重來》。Michael希望為一班情侶吐苦水，表達另一半五時花六時變，令人捉摸不定嘅心態；而Paula就寫咗一段自己中學時期嘅暗戀故事，雖然都有主動約個男仔，但始終唔敢表達心意。今次嘅MV對於Paula嚟講有好大衝擊，因為佢可以同MCM莫竣名做情侶，連熒幕初吻都奉戲獻埋，搞到佢囉囉攣呀！至於Michael C都唔輸蝕，喺MV入面同女神Shirley Lo有唔少親密接觸，要拍攝時唔老尷，佢哋就全靠一盒餃子打開話題。Paula有得同MCM Kiss，Michael C都葡萄話想有呢個福利，而對象就係佢「老婆」 Julia吳卓源喇！
Michael C之前出咗三首國語歌，本來喺疫情前計劃咗去台灣發展，但呢幾年佢搵到新方向，眼見香港樂迷聽歌嘅接受程度越嚟越高，今次出咗第一首廣東歌，佢話會繼續做落去，而Paula同佢一樣，都想同本地歌手Crossover呀！
