【Viu】張繼聰排除萬難、終於喺噚晚舉行麥花臣演唱會，完騷佢直言好滿足，仲透露有機會喺2023年下半年度開part 2添呀！講到佢喺歌與歌之間嘅講嘢位都搞到全場鬼死咁開心，問想唔想挑戰開talk show？點知阿聰耍手擰頭謙稱只係純粹多嘴，要交番畀專業人士，仲篤爆坐喺台下嘅老婆Kay謝安琪係咁以眼神示意講太多，認真爆笑！
提起囡囡Kakaball擔任特別嘉賓，阿聰讚囡囡好畀心機準備，又話當時坐喺後面聽個囡唱歌百感交集，既緊張又sweet，不過就唔知囡囡大個會唔會想做歌手，無論如何，阿聰奸笑話：「人生第一次上台唱歌就係有爸爸陪住！（畀幾多分？）無限分！『繽紛』！」另外，講到阿聰揀咗作畀Jeremy嘅歌《九》嚟唱，佢多謝是晚出席嘅「鏡仔」，問會唔會同埋11位「鏡仔」合作？阿聰就話隨緣，但最後又守唔住秘密咁賣關子話遲啲有新project！
