【Viu】 由MIRROR成員Edan呂爵安主演嘅新戲《過時‧過節》，即將喺11月24號上映。噚日率先曝光嘅電影主題曲《攀上天梯的螞蟻》同MV，YouTube上架唔夠十二個鐘，已經即登熱門影片第八位，超過16萬點擊，係勁嘅！
喺MV入面Edan換咗好幾個Look，再配埋呢部有成110年歷史嘅古琴，鋼琴王子look，是咪睇到大家心心眼呢？加上今次MV都係由電影導演Eric親自操刀，令Edan都特別放心啊！而且為咗扣緊電影故事，MV中都出現咗唔少關於電影嘅元素，Edan同導演都希望大家可以先睇MV打定底，再入戲院支持新片，到時就會明白MV入面嘅小心思喇！除咗運用到電影道具，新歌嘅詞亦完美表達電影中嘅家庭關係，完全講中晒主角阿陽嘅心聲，所以導演最後都要多謝填詞人袁兩半先生啊！
