【Viu】等到啦~ 等到啦~ MIRROR一連12場紅館演唱會聽晚就正式開鑼喇！噚日12位鏡仔終於進駐紅館首踏台板，心情梗係超興奮啦！姜濤、Anson Lo、Edan、Jeremy、阿Jer、Frankie同Stanley都分別喺IG Story post佢哋喺紅館嘅片段同相！雖然噚晚大家排練到零晨4點幾先收工，不過阿姜都好識得寓工作於娛樂，竟然將紅館後台變成佢嘅私人War Game場，攞住枝玩具槍四圍射，搞到班工作人員都「聞姜色變」啊！唔淨止工作人員遭殃㗎，阿姜又點會放過MIRROR班隊友呢！首先搵大表哥同自己張海報試下槍先，下一步梗係搵真人試吓啦！教主同Edan喺後台毫無防備之下受到襲擊，不過大家都知阿姜係百厭貪玩，又點會嬲喎！
