【Viu】ViuTV新劇《季前賽》邀請咗前甲一飛鷹球員兼現役教練Coach Fui梁振雄為劇中一班演員進行籃球指導，Coach Fui大讚MIRROR、ERROR 6子全部都好落力練波，即使拍攝完結，姜濤、Stanley、Edan等仲有繼續跟佢打波添！而Coach Fui仲話Edan認真嘅程度令佢唔夠膽偷懶，而Ian因為本身運動底子好，所以成日叫佢做多啲騰空、跳起嘅動作，Ian通通交到貨！有「馬鞍山高比」之稱嘅Stanley更加唔使講啦，本身就勁靈活又有power，不過Coach Fui就特別提到， Stanley所演嘅張智良令佢非常有共鳴，嗰句「老婆，我想打籃球」簡直經典，講出男人心聲咁話喎！另外Coach Fui仲自爆拍戲期間同姜濤1on1，點知11:0慘敗不特止，場波仲畀姜濤錄低咗，但好彩暫時喺姜濤IG都仲未見到條片，而為咗復仇，卒之燃起咗佢練體力嘅心，最後一雪前恥，成功攞返啲face啊！
