【Viu】毛舜筠、謝君豪、談善言、張繼聰同Angela袁澧林噚晚出席《第19屆香港亞洲電影節》，毛姐預告Edan同Anson Lo將會歸隊宣傳新片《過時．過節》；姜濤同Jer都會為《阿媽有咗第二個》謝票。佢仲拍心口話會說服剛離巢嘅老友Do姐再拍電影，反正Do姐都錫MIRROR，一齊合作都好有睇頭喎！
席間，大會送上花束祝賀Angela 29歲生日，令佢感動到眼濕濕呀！Angela話生日願望唔係憑《窄路微塵》奪金馬影后，對獎項抱平常心。講到佢同Edan傳緋聞，Angela就話只係好朋友，冇上過屋企，但生日都有收到朋友式祝賀短訊嘅！
至於阿聰就爆囡囡有捧《季前賽》場，雖然不斷追問Anson Lo幾時出場，但見到姜濤都有醒一醒神，認真搞笑！阿談就話希望《野人老師》拍續集，事關結局留有伏線！
