【viu】Ben Sir歐陽偉豪由大學講師轉戰幕前做主持，最近佢約滿回復自由身，Ben Sir話呢個決定就好似畢業咁，每個階段總會畢業、完結，學有所成嘞當然就係落山，希望嘗試同唔同電視台、媒體合作！而做咗「自由人」嘅Ben Sir即刻sell橋，嚟緊有三個節目想做，第一個就係劇集《教育風雲》，將自己從事30年教育工作嘅經驗、經歷寫成喜劇，另外亦想拍節目《全球廣東話大曬冷》，希望深入探究各地廣東話嘅分別，而最後一個就係《Chill Club睇妞團》！不過Ben Sir就話呢個睇妞團只係搞下gag，另外兩個節目先係認真喎！Ben Sir仲話想打造一齣擺脫周星馳影子嘅喜劇添！講到自己以往喺節目，以拍手代替粗口，結果就因為咁而拍響名堂，Ben Sir都覺得呢個佢人生其中一個轉捩點，事關拍呢個節目之前，佢都經歷過一段迷惘期啊！而對於被網民封做「抽水王」，Ben Sir就抵死回應，話自己畢竟化身過「抽水俠」拍宣傳片，所以作為一個抽水俠，會抽水係好合理嘅！
